صباح الواقعية

Full transcript

صباح الخير، أما بعد… مافي شي مضمون إلا ما وعد به رب العالمين. أما في الأرض دي، فنحن هنا أصلًا في دار اختبار، قال تعالى: الذي خلق الموت والحياة ليبلوكم أيكم أحسن عملًا، وقال تعالى: وجعلنا بعضكم لبعض فتنة أتصبرون وكان ربك بصيرًا. يعني باختصار، ما كل الحاصل في الدنيا مفروض يعجبك، وما كل حاجة بتتمناها حتحصل، وما كل توقعاتك حتلقى الواقع بيمشي على حسبها. العِشرة بتهون عادي جدًا، والمحبة بتزول في غمضة عين، والغائب احتمال كبير جدًا ما يعود تاني. وحبل الكذب طويل جدًا جدًا، لكن مهما طال، للحقيقة يوم بتظهر فيه. عشان كدا، الناس تكرب القاش، وتبطل الجرسة والأحلام الطفولية، وتبطل تتعامل مع الدنيا كأننا عايشين في يوتوبيا، وكأن الأصل فيها إنو كل حاجة تمشي زي ما بنشتهي، وكل الناس تكون زي ما بنتوقع، وكل النهايات تكون سعيدة. مرات الابتلاء بيجيك في صورة حاجة فقدتها، ومرات في حاجة اتمنيتها وما حصلت، ومرات في حقيقة ما كنت مستعد تواجهها، ومرات في نعمة عندك وما حاسس بيها إلا بعد ما تتغير الأحوال. الدنيا ما دار تحقيق الأماني، الدنيا دار ابتلاء؛ والعبرة ما بس الحصل ليك، العبرة كمان كيف اتعاملت مع الحصل ليك. فكرب قاشك، واضبط توقعاتك، وخلي يقينك في رب العالمين أكبر من تصوراتك عن الدنيا. صباح الواقعية… للناس المستعدة تواجه الحياة زي ما هي، ما زي ما بتتمنى تكون.